| |
ජූඩෝ අගමැති
3-13-2010
ව්ලැඩිමීර් පුටින් දැන් රුසියාවේ ජනාධිපති නොව අගමැතිය. ඒ රුසියානු ව්යවස්ථාව අනුව දෙවරකට වඩා ජනාධිපති ධූරය දැරීමට නොහැකි නිසාය. එසේ වුවත් රුසියානු ජනතාව ස්වකීය නායකයා වශයෙන් සලකන්නේ රුසියානු ආණ්ඩුක්රම ව්යවස්ථාව අනුව රුසියාවේ ජනාධිපතිට වඩා පහල නිලයක් වන අගමැති තනතුර හොබවන ව්ලැඩිමීර් පුටින්වය. ඒ රුසියානු ජනතාව ආණ්ඩුක්රම ව්යවස්ථාවට ගරු නොකරන නිසා නොවේ. ඊට වඩා පුටින්ට ගරු කරන නිසාය. ලෝකයේ බොහෝ ජනාධිපතිවරු හා අගමැතිවරු සිටිති. ඔවුන්ගෙන් බොහෝ දෙනෙක් කුඩා කාලයේ සිට දේශපාලනය කිරීමට පෙරුම් පිරූවෝ වෙති. ජනාධිපති කෙනෙක් අගමැති කෙනෙක් ඇමති කෙනෙක් වීම ගැන සිහින දුටුවෝ වෙති. ඇතැම් විට කුඩා කල සිටම ඒ මාර්ගයට යොමු කරනු ලැබූ දේශපාලනඥයන්ගේ ම දරුවෝ වෙති. එහෙත් රුසියාවේ ජනාධිපතිවීම පුටින්ගේ තුන් හිතකවත් තිබූ දෙයක් නොවේ. ඔහු ජනාධිපති තනතුර කරා ආවේ අහම්බෙනි. ඔහු මෙතරම් ම සාර්ථක ජනාධිපතිවරයෙකු වූයේ ද සමහරවිට ඒ නිසා විය හැකිය. පුටින් සාර්ථක ජනාධිපතිවරයෙකි යැයි මා කියන්නේ ඇයි? ගොර්බචොව් විසින් නන්නත්තාර කරන ලද රුසියාව පුනරුත්ථාපනය කොට නැවත ලෝකයේ බලවතෙකු බවට පත්කරනු ලැබුවේ පුටින් වීම නිසාය.
1952 ඔක්තෝබර් 7 වන දින ව්ලැඩිමීර් පුටින් රුසියාවේ ලෙනින්ග්රෑඞ් නගරයේ දී උපත ලැබුවේය. ඇත්ත කතාව නම් රුසියාවේ සාර් යුගයේදී සමාජවාදයට තිබූ මර්දනයට වැඩි මර්දනයක් සමාජවාදී යුගයේ දී ආගම සම්බන්ධයෙන් කි්රයාත්මක වූ බවය. සමාජවාදී සෝවියට් දේශය තුළ ආගම ඇදහීම නීතිවිරෝධී කි්රයාවක් විය. එහෙත් මතුපිටින් ආගම ඇදහීම තහනම් කළ හැකි වුවත් ආගම දහම කෙරෙහි හදවතේ පවතින බැඳීම තහනම් කළ නොහැක. පුටින්ගේ අම්මා ආණ්ඩුවේ තහනම් නොතකා පුටින් රුසියානු ඕතඩොක්ස් කි්රස්තියානි දරුවෙකු ලෙස බෞතීස්ම කිරීමට කි්රයා කළේ ඒ නිසාය. මෙහිදී රුසියාවට හොඳ ජනාධිපතිවරයෙකු ලැබීමට හේතු වූ තවත් කරුණක් අවබෝධ කරගැනීමට හැකිය. එනම් පුටින් ආගමට දහමට ලැදි නායකයෙකු වීමය. ලෝකය කොතරම් දියුණු වුව ද යම් මිනිසෙකු හොඳ මිනිසෙකු ද නරක මිනිසෙකු ද යන්න තීරණය කිරීම සඳහා තවමත් පවතින හොඳම හා සමහරවිට එකම ක්රමය ස්වකීය ජාතිය ආගම පවුල නෑයන් හා අසල්වාසින් කෙරෙහි ඔහු තුළ පවතින භක්තියය. ව්ලැඩිමීර් පුටින් එවන් ආගමට දහමට ලැදි නායකයෙකි.
මුලින් කිව් ලෙස පුටින් පෙරුම් පිරූවේ මන්තී්ර කෙනෙකු, ඇමති කෙනෙකු වීමට නොවේ. ඒ නිසා පාසල් වියේ දී පුටින් ප්රි්රය කළේ රහස් පරීක්ෂක චිත්රපට නැරඹීමටය. ජූඩෝ ඉගෙනගැනීමටය. ජූඩෝ ඉගෙනගැනීමට කොපමණ ආසාවක් දැක්වූයේ ද යත් එය කළු පටි හය ශ්රේණිය ලබාගැනීම දක්වා ම දුර ගියේය. ලෙනින්ග්රාඞ් නගරයේ ජූඩෝ ශූරයා බවට ද පත්වූයේය. සටන් කලාවන් කෙරෙහි පුටින්ගේ ආසාව කොතරම් ද යත් රුසියානු ජනාධිපති වශයෙන් චීනයේ සංචාරයක යෙදුණු අවස්ථාවක දී චීනයේ සුප්රසිද්ධ සටන් කලා ආරාමයක් හෙවත් ෂැවොලින් ටෙම්පල් කරා යාමට ද පුටින් අමතක නොකළේය.
එසේම තවත් කිවයුත්තක් තිබේ. සාමාන්ය අදහස වන්නේ ජූඩෝ කරාටේ ආදී කී්රඩාවන් කරන්නේ නුවණ නැති එහෙත් ඇඟපත හයිය ඇති අය බවය. චෙස් වැනි කී්රඩාවන් කරන්නේ ද බුද්ධිමතුන් බවය. ලෙනින් ද චෙස් කී්රඩාවේ යෙදී සිටින ප්රසිද්ධ ඡායාරූපයක් ද තිබේ. හිටපු ලෝක චෙස් ශූරයා වන ගැරී කැස්පරොව් ද අද රුසියානු දේශපාලනයේ සිටියි. එහෙත් ඔහුට දේශපාලන ක්ෂේත්රයේදී පුටින් සමඟ හැරෙන්නටවත් නොහැක. ඒ අනුව කිව හැකි කතාව වන්නේ සමහර විට ජූඩෝ කී්රඩකයන් චෙස් කී්රඩකයන්ට වඩා නැණවත් විය හැකි බවය. පාසල් අධ්යාපනය නිමා කර පුටින් ලෙනින්ග්රාඞ් රාජ්ය විශ්ව විද්යාලයට ඇතුළත් ව ජාත්යන්තර නීතිය පිළිබඳ උපාධියක් ලබාගත්තේය. ඉන්පසුව කුඩා වියේ දී රහස් පරීක්ෂක චිත්රපට නරඹමින් දුටු සිහිනය සැබෑ කරගනිමින් රුසියානු කේ.ජී.බී රහස් ඔත්තු සේවාවේ නිලධාරියෙකු බවට පත්වූවේය. 1983 ජූලි 28 දින පුටින් විවාහ විය. ඒ තමන් සමඟ ලෙනින්ග්රාඞ් විශ්ව විද්යාලයේ එකට ඉගෙන ගත් පසුව ගුවන් සේවිකාවක් බවට පත්වූ ලූද්මීලා සමඟය. ඔවුන්ට දියණියන් දෙදෙනෙක් සිටිති. වැඩිමහල් දියණියගේ නම මාරියා පුටිනා වන අතර බාල දියණිය කැතරිනා කාත්යා පුටිනාය. 1985 සිට 1990 දක්වා පුටින් කේ.ජී.බී නිලධාරියෙකු ලෙස නැඟෙහිර ජර්මනියේ සේවය කළේය.
සෝවියට් දේශය කැඩී බිඳී යන්නට විය. ගොර්බචොෆ්ගේ පාලනය එයට හේතුවිය. මේ අතර ගොර්බචොෆ් පරදවමින් තවත් අයෙකු රුසියාව තුළ ජනප්රි්රය වන්නට විය. ඔහු බොරිස් යෙල්ට්සින්ය. ගොර්බචොෆ් රුසියාවට කළ විනාශය සම්පූර්ණ කළේ යෙල්ට්සින් විසින් යැයි කිව හැකිය. එහෙත් ඒ සියල්ලටම වන්දි ගෙවීමට මෙන් ඔහු එක් හොඳ දෙයක් කළේය. ඒ ව්ලැඩිමීර් පුටින් දේශපාලනයට ගෙන ඒමය. ස්වකීය ජනාධිපති ධූර කාලය නිමවන්නට තවත් වසරක් පමණ තිබිය දී බොරිස් යෙල්ට්සින් 1999 දෙසැම්බර් 31 වැනි දා ජනාධිපති ධූරය හැර ගියේය. ඒ නව සහස්රකයේ හෙවත් 2000 ජනවාරි පළමුවෙනිදා සිට රුසියාවේ වැඩබලන ජනාධිපති පදවියට ව්ලැඩිමීර් පුටින් පත් කරමිනි.
2000 වර්ෂයේ පැවති ජනාධිපතිවරණයෙන් පුටින් ජයගත්තේය. රුසියාව යළි හිස ඔසවන්නට වූවේ එතැන් සිටය. පුටින් දැඩි පාලකයෙක් වූවේය. රුසියාවේ ඛනිජ තෙල් සම්පත්වලින් සියයට 20ක් ලෝකයේ ඛනිජ තෙල් සම්පත්වලින් සියයට 2ක් හිමි කරගෙන සිටි මීහායල් කොඩොකව්ස්කි සිරභාරයට ගැනීමට තරම් නිර්භීතවීම උදාහරණයකි. කොල්ලකාරී යුරෝපය සමාගම්වල ග්රහණයෙන් රුසියානු ඛනිජතෙල් සම්පත් මුදවාගෙන ඒ ආදායම් රටේ යහපත උදෙසා යෙදවීමට පුටින්ට හැකි විය. 2000 සිට 2008 වන විට රුසියාවේ දළ ජාතික නිෂ්පාදිතය දෙගුණ කරන්නට පුටින්ට සමත් විය. ඔහු ඇමරිකාවට බිය නැති නායකයෙකි. රුසියාවට ආදරය කරන නායකයෙකි. මුලින් ද කිව් ලෙස ව්යවස්ථාවට අනුව දෙවරකට වඩා ජනාධිපතිවීමට නොහැකි වූ නිසා පුටින් දැන් රුසියාවේ අගමැතිය. එහෙත් යම් ආකාරයකින් හෙට ජනාධිපතිවරණයකට ඉදිරිපත් වන්නට හැකි වුවහොත් යළිත් ජනාධිපති වන්නේ පුටින්ය.
|
දුම්රියෙන් ආදායම
3-13-2010
දුම්රිය දෙපාර්තමේන්තුව ඉකුත් වසරේදී රුපියල් මිලියන 4020 ක ආදායමක් ලබා ඇති අතර එය අපේක්ෂිත ඉලක්කයට වඩා රුපියල් මිලියන 74ක වැඩිවීමක් බව දුම්රිය සාමාන්යාධිකාරි පී.පී.විජේසේකර මහතා පැවසී ය.
2009 වසරේ ආදායම් ඉලක්කය වූයේ රුපියල් මිලියන 3946 කි. 2009 වසරේ මුල් භාගයට වඩා අගභාගය ආදායම සියයට 14කින් වැඩි වී ඇතැයි ද ඒ මහතා කීය.2008 වසරේ ලබාඇති ආදායම රුපියල් මිලියන 3671 කි.
දුම්රිය දෙපාර්තමේන්තුව මේ වසරේ රුපියල් මිලියන 5000ක ආදායමක් ඉලක්ක කර තිබේ. භාණ්ඩ ප්රවාහනය, ප්රවේශපත් නොමැතිව ගමන් කරන්නන් වැටලීම, දුම්රිය ඉඩම් කුලියට හා බදුදීම තුළින් ලැබූ ආදායම හා ඉකුත් වසරේ මැද භාගයේ දුම්රිය ගාස්තුව වැඩිකිරීම ආදි හේතු මේ සඳහා බලපා තිබෙන බව විජේසේකර මහතා සඳහන් කළේ ය.
ප්රවේශපත් නොමැතිව දුම්රියෙන් යන මගී ප්රමාණය දැන් අඩුවී ඇති බවද ඒ මහතා කීය.
|
ෆොන්සේකා නිදහස් කරනවා
3-13-2010
එක්සත් ජාතික පක්ෂ ආණ්ඩුවක් පත්වූ වහාම අත්අඩංගුවේ පසුවන ජෙනරාල් සරත් ෆොන්සේකා මහතා නිදහස් කරන බව එම පක්ෂය නිවේදනයක් නිකුත් කරමින් අවධාරණය කරයි.
කිසිදු සාධාරණ හේතුවකින් තොරව ෆොන්සේකා මහතා අත්අඩංගුවේ තබා ඇති බව එක්සත් ජාතික පක්ෂය නිකුත් කළ නිවේදනයේ සඳහන් වේ. ඔහුට එරෙහිව කිසියම් චෝදනාවක් ඇත්නම් සාමාන්ය නීතිය යටතේ ඒ සම්බන්ධයෙන් ක්රියා කළ යුතු බව ද එම පක්ෂය පෙන්වා දෙයි.
සරත් ෆොන්සේකා මහතා රඳවා තබාගැනීම සමාන කළ හැක්කේ මියන්මාරයේ විපක්ෂ නායිකා අවුන් සාන් සුකී රඳවා තබා ගැනීමට පමණක් බව එක්සත් ජාතික පක්ෂය නිකුත් කළ නිවේදනයේ වැඩිදුරටත් සඳහන්ය.
|
යුද අධිකරණ විනිසුරු මඬුල්ල
3-11-2010
ජෙනරාල් සරත් ෆොන්සේකාට එරෙහි චෝදනා විභාග කරනු ලබන යුද අධිකරණය සඳහා හමුදා විනිසුරු මඩුල්ල අද (11 දා පත් කිරීමට නියමිතව ඇතැයි හමුදා ප්රකාශක මේජර් ජෙනරාල් ප්රසාද් සමරසිංහ මහතා පැවැසීය.
යුද හමුදාපති ලුතිනන් ජෙනරාල් ජගත් ජයසූරිය විසින් මෙම යුද අධිකරණය පත් කරනු ඇත.
ජනාධිපති මහින්ද රාජපක්ෂ මහතාගේ ප්රධානත්වයෙන් ඊයේ (10 දා) පැවැති ආරක්ෂක මණ්ඩල රැස්වීමේදී මෙම යුද අධිකරණය පත් කිරීම පිළිබඳ අවසන් තීරණය ගැනීමට නියමිතව තිබූ බවද මේජර් ජෙනරාල් සමරසිංහ පැවැසීය.
|
එතෙර බැංකුවල ගිණුම්
3-11-2010
විදේශ රටක ඕනෑම වෘත්තියක නියුතු නේවාසික ශ්රී ලාංකිකයන් ඇතුළු පාර්ශව ගණනාවකට විදේශ බැංකුවල ගිණුම් ආරම්භ කිරීමට හා පවත්වාගෙන යාමට මහබැංකුව අද සිට අවසර දී ඇත.
මේ යටතේ, ශ්රී ලංකා මහබැංකුව විසින් අනුමත කරන ලද විදේශ ආයෝජකයන්ගෙන් විදේශ විනිමය උපයන පුද්ගලයින්, ශ්රී ලංකාව ඇතුළත හෝ විදේශයක අන්තර්ජාතික වෘත්තීය සේවා සපයන පුද්ගලයින්, අධ්යාපනික සහ වෛද්ය ප්රතිකාර සඳහා විදේශ රටවලට ගිය පුද්ගලයන් මෙන්ම භාණ්ඩ අපනයනකරුවන්ට මෙම අවසරය ලබා දී ඇති බව මහබැංකුව ප්රකාශ කරයි.
විදේශ විනිමය ගණුදෙනු තවදුරටත් ලිහිල් කර ඇති අතර, පූර්ව ගෙවීම් පදනම මත ආනයනය කිරීමේදී බිල්පත් වටිනාකම මත වූ දැනට පවතින 100% ආන්තික තැන්පතු අවශ්යතාව ඉවත් තර ඇත.
මෙම ක්රියාවලියට අමතරව, ආනයන බිල්පත් සඳහා පනවා ඇති පූර්ව ගෙවීම් අත්හිටුවීම ඉවත් කර ඇත. එසේම භාණ්ඩ හා සේවා අනුමත විදෙස් ණය දීම් හා ණය ගැනීම් වලට අදාළ ගණුදෙනු සඳහා විදේශ ව්යවහාර මුදලින් ඉදිරි ගිණුම් වලට එළඹීමටද අවසර දී ඇත.
මෙම ක්රියාවලිය තුළින් ආයෝජකයින් තුළ විශ්වාසය වර්ධනය වන අතර, රටේ ආර්ථිකය ගෝලීය ආර්ථිකය හා ගැලපුම් ඇති කර ගැනීමට අවස්ථාව උදා වන බව ද මහබැංකුව ප්රකාශ කරයි.
|
ක්රිකට් ක්රීඩකයන්ට දැඩි දඬුවම්
3-11-2010
(කොළඹ, ලංකාපුවත්, මාර්තු 11) පාකිස්තාන ක්රිකට් බළධාරීන් විසින් එරට ජාතික ක්රිකට් කණ්ඩායමේ හිටපු නායකයන් වූ යුනුස් ඛාන්ට සහ මොහොමඩ් යූසුෆ්ට දින නියමයක් නොමැතිව තරග තහනමක් පනවා තිබේ.
එමෙන්ම ෂොයිබ් මලික් සහ නවීඩ් රානාට වසරක තරග තහනමක්ද, අක්මාල් සොයුරන්ට සහ සහීඩ් අෆ්රිඩිට මාස 6ක පරිවාස කාල සීමාවක් පනවා රුපියල් මිලියන 2 – 3 ක් අතර දඩ මුදලකට යටත් කිරීමට ද එරට ක්රිකට් බළධාරීහු තීරණය කර ඇත.
පාකිස්තාන ක්රිකට් කණ්ඩායමේ ඕස්ට්රේලියානු සංචාරය සම්පූර්ණයෙන්ම අසාර්ථකවීම පිළිබඳව කරුණු සොයා බැලීමට පත් කළ කමිටු වාර්තාවට අනුව මෙම දඬුවම් ලබාදී ඇති අතර මෙය පාකිස්තාන ක්රිකට් ඉතිහාසයේ ලබාදුන් ඉතා දරුණුම තීරණය ලෙස හැදින්වේ.
මෙහිදි යුනුස් හා යූසුෆ්ට ජීවිතාන්තය දක්වා තරග තහනමකය සමාන දඬවමක් ලබාදී තිබේ. පාකිස්තාන ක්රිකට් ප්රධානි ඉජාස් බට් මේ පිළිබඳව සඳහන් කර ඇත්තේ, මෙම ක්රීඩකයන්ට එරෙහිව ගත් තීරණ කිසිසේත් වෙනස් නොවන බවයි.
නමුත් මෙම ක්රීඩකයන්ට දේශීය හා ප්රාන්ත ක්රිකට් තරගවලට සහභාගිවීමේ අවස්ථාව තිබෙන බව පාකිස්තාන ක්රිකට් මණ්ඩලය දන්වා සිටියි.
|
දියණියන් සමඟ කතා කිරීමට අවස්ථාව
3-08-2010
ජෙනරාල් සරත් ෆොන්සේකා මහතාට දියණියන් දෙදෙනා සමඟ පමණක් දුරකථනයෙන් කතා කිරීමේ අවස්ථාව ඊයේ (08 වැනිදා) සිට ලබාදුන් බව යුද හමුදා මාධ්ය ප්රකාශක මේජර් ජෙනරාල් ප්රසාද් සමරසිංහ මහතා පැවැසීය. සරත් ෆොන්සේකා මහතාට දුරකථනය ඔස්සේ කතා කිරීමේ අවස්ථාව ලබාදී තිබූ අතර පෙරේදා (07 වැනිදා) සිට තම දියණියන් සමඟ දුරකථනයෙන් කතා කිරීමේ අවස්ථාව අහිමි කර ඇතැයි පවසමින් එදින ආහාර ගැනීමෙන් වැළකී සිටි බව වාර්තා විය.
සරත් ෆොන්සේකා මහතාට දුරකථනයෙන් කතා කිරීමේ අවස්ථාව යුද හමුදාපතිවරයා විසින් ලබාදුන් වරප්රසාදයක් මත සිදුවුවක් බව ද පෙන්වා දුන් මාධ්ය ප්රකාශකවරයා එතුමා සිටින ස්ථානය කාමර තුනකින් සහ පැන්ටි්රයකින් යුක්තව පවතින බව ද කීය.
|
ජෙනරාල් යුද අධිකරණය හමුවට
3-08-2010
හිටපු යුද හමුදාපති හා ආරක්ෂක මාණ්ඩලික ප්රධානී ජෙනරාල් සරත් ෆොන්සේකා මහතා චෝදනා පහක් යටතේ ඉදිරි සතිය ඇතුළත යුද අධිකරණයක් හමුවට ඉදිරිපත් කිරීමට නියමිතය.
ඒ මහතාට එරෙහිව පුද්ගලයන් තිස්පස්දෙනකුගෙන් සාක්ෂි සම්පිණ්ඩන වාර්තාවක් යුද හමුදාපතිවරයා වෙත ලැබී ඇතැයි ද එම වාර්තාව යුද හමුදා නීති අංශය වෙත මේ වන විට යොමුකර හමුදා පනත යටතේ කටයුතු කිරීම සිදුකරන බව ද ඊයේ (08 වැනිදා) ආරක්ෂක මාධ්ය මධ්යස්ථානයේ පැවැති මාධ්ය හමුවකට සහභාගි වෙමින් යුද හමුදා මාධ්ය ප්රකාශක මේජර් ජෙනරාල් ප්රසාද් සමරසිංහ මහතා පැවැසීය.
හිටපු ආරක්ෂක මාණ්ඩලික ප්රධානී ජෙනරාල් ෆොන්සේකා මහතාට එරෙහිව සාක්ෂි ගොනුකළ පිරිස් අතර හමුදා නිලධාරීන් 22 දෙනකු, පොලිස් නිලධාරීන් 07 දෙනකු සහ සිවිල් පුද්ගලයන් 06 දෙනකු සිටින බව ද සමරසිංහ මහතා කීය.
යුද අධිකරණය වෙත නිලධාරීන් තිදෙනකු හෝ පස්දෙනකු ඉදිරි දින දෙක ඇතුළත පත්කිරීමට නියමිත බව පැවැසූ සමරසිංහ මහතා ජනාධිපතිවරයා විසින් හමුදාපතිවරයාට ලබාදෙන උපදෙස් මත එය සිදුකෙරෙන බව ද පැවැසීය. අවශ්ය නම් ජනාධිපතිවරයාට එම පිරිස පත්කිරීමේ හැකියාව පවතින අතර ත්රිවිධ හමුදාව හෝ යුද හමුදාව පමණක් නියෝජනය විය යුතුද යන්න තීරණය කළ හැක.
ෆොන්සේකා මහතාට එරෙහිව යුද හමුදා අධිකරණය හමුවේදී ඔහු වෙනුවෙන් පෙනී සිටීමට නීතිඥ මහත්වරුන්ට අවස්ථාව ලැබෙන අතර ලබාදෙන තීන්දුවට එරෙහිව අභියාචනාධිකරණයට හොA ශ්රේෂ්ඨාධිකරණයට යැමේ හැකියාව එතුමාට පවතින බව ද මාධ්ය ප්රකාශකවරයා පෙන්වා දුන්නේය. එමෙන්ම ඒ මහතාට එරෙහිව සිවිල් අධිකරණයක් හමුවේ චෝදනා ගොනුකිරීමක් නොකෙරෙන බව ද කීය.
|
ෆොන්සේකාට සාක්ෂි අවසන්
3-07-2010
(කොළඹ, ලංකාපුවත්, මාර්තු 07) ජෙනරාල් සරත් ෆොන්සේකා මහතාට එරෙහි සාක්ෂි සම්පිණ්ඩන වාර්තා පිළියෙල කර අවසන් බව යුධ හමුදා මාධ්ය ප්රකාශක ප්රසාද් සමරසිංහ මහතා පැවසීය.
කොළඹ පැවති මාධ්ය හමුවකදී අදහස් දක්වමින් ඒ මහතා පවසා සිටියේ, ජෙනරල් ෆොන්සේකා මහතා සම්බන්ධ නඩුවට අදාළ සාක්ෂි මේවන විට පුද්ගලයන් 31 දෙනෙකුගෙන් ලබා ගෙන ඇති බවයි.
එසේ ලබාගත් සාක්ෂි හා තාක්ෂණික සාක්ෂි උපයෝගි කරගනිමින් චෝදනා වලට අදාළ තාක්ෂණික වාර්තාවක් ද පිළියෙළ කර ඇති අතර ඉදිරි සතිය තුළ එම වාර්තා යුද හමුදාපතිවරයාට භාර දීමට නියමිත බව ප්රසාද් සමරසිංහ මහතා අවධාරණය කළේය.
|
දේශපාලනයටත් හුරු වෙනවා
3-07-2010
මට විශාල දේශපාලන අත්දැකීම් ප්රමාණයක් නැති වුණත් ක්රිකට් ක්රීඩාව වගේ පිටියේ ඕවර් දෙක තුනක් ඉඳලා ක්රීඩා කරනවා වගේ ඉදිරියේදී දේශපාලන පිටියට හුරුවන බව මාතර දිස්ත්රික් එක්සත් ජනතා නිදහස් සන්ධානයේ අපේක්ෂක සනත් ජයසූරිය මහතා පැවසීය.
ජයසූරිය මහතා මෙම අදහස් පැවැසුවේ කඹුරුපිටිය පලොල්පිටියේ පැවැති ජනහමුවක් අමතමිනි.
වැඩිදුරටත් අදහස් දැක්වූ ජයසූරිය මහතා,
අද වන විට මම ක්රිකට් ක්රීඩාවෙන් හිණි පෙත්තමට යන්නට හැකි වෙලා තිබෙනවා. ඊට මූලිකම පදනම බවට පත් වුණේ මගේ කැප වීම. එදා මට හරියට සපත්තු දෙකක් තිබුණේ නෑ. කොළඹ ක්රිකට් ගහන්න ගියාම මට හරියට සල්ලි තිබුණේ නැහැ. ඒ නිසා මේ පොළවේ ජීවත්වන මිනිසුන්ගේ වේදනාව මට ඉතා හොඳින් දැනෙන පුද්ගලයෙක්. මා දේශපාලනයට ඒමට සිතා සිටි පුද්ගලයෙක් නොවෙයි. ජනාධිපතිතුමාගේ ඉල්ලීම අනුව තමයි මා දේශපාලන පිටියට පැමිණියේ. දේශපාලනයට එන්න කලින් මා මාතර ජනතාව වෙනුවෙන් මාතර රෝහලට පන්සල් වලට උදව් උපකාර කරනු ලැබුවා. ඒ දේවල් සිදු කරනු ලැබුවේ දේශපාලනයට ඒමේ අදහසකින් නම් නොවෙයි. මේ රටේs අභිමානය අපි රැකිය යුතුයි. එය ඉදිරියටත් පවත්වා ගෙන යැම අපි වැනි ක්රිකට් ක්රීඩකයන් කළ යුතු වගකීමක් වනවා.
අද වන විට මේ ප්රදේශයේ බොහෝ පිරිස් වලට රස්සාවල් නැහැ. පාලම් බෝක්කු කැඩිලා. ඒ නිසා මේ මාතර දිස්ත්රික්කයේ ජනතාවගේ බලාපොරොත්තු අපි ඉටු කළ යුතුව පවතින බවද ජයසූරිය මහතා පැවැසීය.
දකුණු පළාත් සභා මන්ත්රී අරුණ ගුණරත්න මහතා -
මේ රටට අද අලුත් ඇසකින් රට දිහා බලන මිනිසුන් අවශ්ය යුගයක්. ඒ නිසා තමයි ජනාධිපතිතුමා සනත් වැනි ලෝක පූජිත ක්රිකට් ක්රීඩකයෙක් මේ මැතිවරණයට ඉදිරිපත් කරනු ලැබුවේ.
ජනාධිපතිවරණයේ දී ජනාධිපතිතුමාගේ ජයග්රහණය වෙනුවෙන් ඉදිරියට පැමිණිලා රට බේරාගත් යුග පුරුෂයාගේ දේශපාලන ව්යාපාරයට දැවැන්ත කාර්යභාරයක් සනත් ඉටු කරනු ලැබුවා. සැමදාමත් රට වෙනුවෙන් රටේ ගෞරවය අභිමානය වෙනුවෙන් කැපවීම් කළ මෙවැනි පුද්ගලයන් දේශපාලනයට අවතීර්ණ වීම මේ රටට වාසනාවක් බවද මන්ත්රීවරයා වැඩිදුරටත් පැවැසීය.
මේ අවස්ථාව සඳහා මාතර ප්රාදේශීය සභා මන්ත්රී අජිත් පරණ විතාන මහතා ද ජන හමුව ඇමතීය.
|
ජෙනරාල් උපවාසයක්
3-07-2010
යුද හමුදාව විසින් අත්අඩංගුවට ගෙන නාවික හමුදා මූලස්ථානයේ රඳවා සිටින හිටපු හමුදාපති සහ හිටපු ආරක්ෂක මාණ්ඩලික ප්රධානි ජෙනරාල් සරත් ෆොන්සේකා මහතා ඊයේ (07 දා) පෙරවරුවේ සිට මාරාන්තික උපවාසයක් ආරම්භ කර ඇත.
විදෙස්ගතව සිටින තම දියණියන් දෙදෙනාට දුරකථනයෙන් ඇමතීමේ අවස්ථාව ආරක්ෂක අමාත්යාංශය විසින් වළක්වා ඇතැයි ද එම අවස්ථාව යළි ලබාදෙනතුරු ජෙනරාල් සරත් ෆොන්සේකා මහතා නිරාහාරව උපවාස කරන බව පෙරේදා (06 දා) රාත්රියේ තමාට දැනුම් දුන් බව ද අනෝමා ෆොන්සේකා මහත්මිය ඊයේ (07 දා) මාධ්යවේදීන් හමුවේ හැඟීම්බරව ප්රකාශ කර සිටියාය.
එහිදී අනෝමා ෆොන්සේකා මහත්මිය මෙසේද ප්රකාශ කළාය.
මට මේ දුක කියන්න තියෙන්නේ මාධ්යයට විතරයි. මම 06 වැනිදා රාත්රි ආහාර අරගෙන මගේ සැමියා බලන්න නාවික හමුදා මූලස්ථානයට ගියා. වෙනදාටත් මම මගේ ජංගම දුරකථනය සැමියා රඳවා සිටින තැනට ගෙනයනවා. ඒ ගෙන ගියාම ඔහු දවල්ටත්, රෑටත් විදේශගතව සිටින දූලා දෙන්නාට කතා කරනවා. ඒත් 06 වැනිදා (පෙරේදා) මට හමුදා නිලධාරීන් කිව්වා ජංගම දුරකථනය ගෙනයන්න අවසර දෙන්න බැහැ කියලා. මගේ පපුවට දැඩි කම්පනයක් ඇතිවුණා. මගේ සැමියා ආදරණීය පියෙක්. හොඳ සැමියෙක්. ඔහු දරු දෙදෙනා සමඟ ඉතා තද බැඳීමක් තියෙනවා. යුද්ධ කරන කාලෙදිත් හැම විටකම දරු දෙදෙනා සමඟ දුරකථනයෙන් කතා කරනවා. අධිකරණය පවා එකඟ වුණ මේ අවස්ථාවේ මානුෂිකව සිතිය යුතුයි කියලා. ඒත් අධිකරණ නියෝගයන්ටත් පටහැනිවයි ආරක්ෂක අමාත්යාංශය මේ දුරකථනය ගෙනයැම තහනම් කරමින් නියෝගයක් දී තිබෙන්නේ. මේක පළිගැනීමක්. දරු සෙනෙහස, පිය සෙනෙහස නොහඳුනන මිනිසුන් දුන් අධර්මිෂ්ඨ නියෝගයක්. හදවත් නැති අයට විතරයි මේ විදිහට කරන්න පුළුවන්. ඔහු මට කිව්වා මගේ දරු දෙදෙනා එක්ක තියෙන සම්බන්ධකම් නතර කරන්න හදනවා. ඒ නිසා මම ආහාර ගන්නේ නැහැ. මින් පස්සේ කෑම ගේන්නත් එපා කියලා. ඔහු ඒ විදිහෙ තීරණයක් ගත්තාම මම මොනවා කරන්නද? මට කළ හැක්කක් නැහැ.....
|
ෆොන්සේකාට නඩු දෙකක්!
2-26-2010
විශ්රාමික ජෙනරාල් සරත් ෆොන්සේකා මහතා හමුදාපති ධුරයේ සිටියදී කරන ලදැයි කියන වැරැදි ගණනාවක් සම්බන්ධයෙන් සිවිල් නීතිය හා යුද හමුදා නීතිය අනුව නඩු දෙකක් පවරන බව රජයේ ඉහළ පෙළේ ප්රකාශකයකු සිළුමිණට පැවසීය.
විනිමය පාලන පනත උල්ලංඝනය කිරීම, හමුදාවෙන් පලා ගිය පුද්ගලයන්ට රැකවරණ සැලසීම හා යුද හමුදාව ඇතුළත බෙදීම් ඇති කිරීම ඇතුළු තවත් චෝදනා රැසක් ගොනු කෙරෙමින් පවතින බවත් හෙතෙම සඳහන් කෙළේය. ජාතික ආරක්ෂාව පිළිබඳ මාධ්ය මධ්යස්ථානයේ අධ්යක්ෂ ජනරාල් ලක්ෂමන් හුළුගල්ල මහතා ගෙන් වැඩිදුර තොරතුරු විමසූ විට ඒ මහතා සඳහන් කෙළේ; අදාළ නඩු පැවරීම් පිළිබඳව නීතිපති දෙපාර්තමේන්තුවේ උපදෙස් මත කටයුතු සිදු කෙරෙමින් පවතින බවත් ඉදිරි දෙසතියක කාලයේදී එකී කටයුතු අවසන් කිරීමට බලාපොරොත්තු වන බවත්ය. මේ අනුව විශ්රාමික ජෙනරාල් සරත් ෆොන්සේකා මහතාට සිවිල් නීති යටතේ අධිකරණයට මුහුණු දීමට සිදුවන අතර යුද හමුදා නීතිය යටතේ ද යුද හමුදා අධිකරණය ඉදිරියේ නඩු විභාගයකට මුහුණ දීමට සිදුවනු ඇත.
හමුදා නීතිය යටතේ අත්අඩංගුවට පත්වූ සරත් ෆොන්සේකා මහතා නිදහස් කරන ලෙස ඉල්ලමින් ශ්රේෂ්ඨාධිකරණයෙන් කැර තිබූ ඉල්ලීමක් ඉකුත් දා ප්රතික්ෂේප කෙරිණ. ෆොන්සේකා මහතාට එරෙහිව දණ්ඩ නීති සංග්රහය යටතේ නඩු පැවරෙන අතර හමුදා අධිකරණයට ඉදිරිපත් කෙරෙන්නේ හමුදා නීතිය උල්ලංඝණය කිරීම සම්බන්ධයෙනි.
|
සන්ධානය ප්රබලයි
2-26-2010
මෙවර මහ මැතිවරණය සඳහා එක්සත් ජනතා නිදහස් සන්ධානය නියෝජනය කරමින් ප්රබලම කණ්ඩායමක් තරග බිමට පිවිස සිටිති. ජ්යෙෂ්ඨ දේශපාලනඥයින්, ප්රකට විද්වතුන්, ජනපි්රය කලාකරුවන්, ක්රීඩක ක්රීඩිකාවන්, තරුණ නියෝජිතයින් ඇතුළු මහජන ප්රසාදය දිනා ගත් අපේක්ෂකයෝ රැසක් ජාතික ලැයිස්තුව හා දිස්ත්රික්ක ලැයිස්තුවල වෙති.
පූජ්ය එල්ලාවල මේධානන්ද හිමි, පූජ්ය ආචාර්ය ඕමල්පේ සෝභිත හිමි, රත්නසිරි වික්රමනායක, දි.මු. ජයරත්න, අනුරුද්ධ රත්වත්තේ, හිටපු කතානායක වි.ජ.මු. ලොකු බණ්ඩාර, ඩලස් අලහප්පෙරුම, මහාචාර්ය ජී.එල්. පීරිස්, එම්.එච්. මොහොමඩ් යන මහත්වරුත් මෙවර සන්ධානයේ ජාතික ලැයිස්තුවට ඇතුළත් කැර තිබීම විශේෂත්වයකි. කීර්තිමත් විද්වතකු වන ජේ.ආර්.පී. සූරියප්පෙරුම මහතා ද හෙළ සිනමාවේ නිළි රැජිණ මාලිනී ෆොන්සේකා මහත්මිය ද ඒ අතර සිටිති.
මීට අමතරව ශ්රී ලංකා කොමියුනිස්ට් පක්ෂයේ ඩිව් ගුණසේකර හා ලංකා සමසමාජ පක්ෂයේ මහාචාර්ය තිස්ස විතාරණ යන මහත්වරු ද මහජන එක්සත් පෙරමුණ වෙනුවෙන් ගීතාංජන ගුණවර්ධන මහතා ද, ජාතික ලැයිස්තුව නියෝජනය කරන අතර තවත් ප්රබල දේශපාලනඥයින් රැසකගේ නම් ද ඊට ඇතුළත් කොට ඇත.
මීට අමතරව දිස්ත්රික්ක වශයෙන් තරග වදින එක්සත් ජනතා නිදහස් සන්ධානයේ අපේක්ෂක ලැයිස්තුවට ද ජ්යෙෂ්ඨ දේශපාලනඥයින් හා කලාකරුවන් ද, ක්රීඩක ක්රීඩිකාවන් ද එක්කොට තිබේ. සෑම දිස්ත්රික්කයක් සඳහාම නවක මුහුණු හඳුන්වා දී තිබීම සන්ධාන ලැයිස්තුවල දක්නට ලැබෙන කැපී පෙනෙන ලක්ෂණයකි.
සනත් ජයසූරිය, සුසන්තිකා ජයසිංහ, වැනි ලෝක පූජිත ක්රීඩක ක්රීඩිකාවන් ද ගීතා කුමාරසිංහ වැනි සම්මානනීය නළු නිළියන් ද මේ අතර වෙති.
එජාපය හා අනෙකුත් දේශපාලන පක්ෂ විසින් ඉදිරිපත් කොට තිබෙන අපේක්ෂක අපේක්ෂිකාවන් සමඟ සාපේක්ෂව වශයෙන් ගෙන බලන විට එක්සත් ජනතා නිදහස් සන්ධානයේ අපේක්ෂක ලැයිස්තුව සෑම අතකින්ම ඉදිරියෙන් සිටින බැව් දේශපාලන විශ්ලේෂකයෝ පෙන්වා දෙති.
මෙවර මැතිවරණයේදී විපක්ෂය සිසීකඩ විසිර ගොස් ඉතා දුර්වල තත්ත්වයක පසුවන බවත් ආණ්ඩු බලය දරන එක්සත් ජනතා නිදහස් සන්ධානයට 2/3 ක විශිෂ්ට ජයග්රහණයක් ලබා ගත හැකි වනු ඇති බවටත් විශ්වාසය පළවී තිබේ.
|
නාම යෝජනා බාරගැනීම
2-26-2010
අප්රේල් 8 වනදා පැවැත්වෙන මහ මැතිවරණය වෙනුවෙන් තරග කරන දේශපාලන පක්ෂ වල සහ ස්වාධීන කණ්ඩායම් වල නාම යෝජනා බාරගැනීම අද මධ්යහ්න 12 න් අවසන් විය.
මේ වන විට නාම යෝජනා සම්බන්ධයෙන් විරෝධතා පළ කිරීම සඳහා කාලය ලබා දී ඇති බව මැතිවරණ මහ ලේකම් කාර්යාලය පවසයි. මධ්යහ්න 12 සිට පස්වරු 1.30 දක්වා කාලය ඒ සඳහා ලබා දී තිබේ.
අද දිනයේ දී එක්සත් ජනතා නිදහස් සන්ධානය, එක්සත් ජාතික පෙරමුණ සහ ප්රජාතන්ත්රවාදී ජාතික සන්ධානය ඇතුළු දේශපාලන පක්ෂ සහ ස්වාධීන කණ්ඩායම් නාම යෝජනා බාර දුන්නේය. ඊයේ දිනයේදී පමණක් දේශපාලන පක්ෂ 22 ක් සහ ස්වාධීන කණ්ඩායම් 52 ක් නාම යෝජනා භාර දී ඇති බව මැතිවරණ මහ ලේකම් කාර්යාලය සඳහන් කරයි. මීට අමතරව ස්වාධීන කණ්ඩායම් 232 ක් ඇප මුදල් තැන්පත් කර තිබුණි.
මේ අතර තැපැල් ඡන්ද සඳහා ඉල්ලුම් කිරීමට ලබා දී තිබූ කාලය අද මධ්යම රාත්රී 12 න් අවසන් වීමට නියමිතය. තැපැල් ඡන්ද ඉල්ලුම් කිරීමට ලබා දුන් කාලය කිසිදු හේතුවක් මත යළි දීර්ඝ නොකරන බව මැතිවරණ මහ ලේකම් කාර්යාලය පවසයි. අවතැන් වූ ජනතාව වෙනුවෙන් ඡන්දය ඉල්ලුම් කිරීම සඳහා ලබා දී තිබූ කාලය ද අදින් අවසන් වේ.
|
ෆොන්සේකා
2-26-2010
හිටපු ආරක්ෂක අංශ මාණ්ඩලික ප්රධානී ජෙනරාල් සරත් ෆොන්සේකා මහතාට එරෙහිව ඇති චෝදනා සඳහා සාක්ෂි සම්පිංඩනය බොහෝදුරට අවසන්ව ඇති බව යුද හමුදා මාධ්ය ප්රකාශක මේජර් ජෙනරාල් ප්රසාද් සමරසිංහ මහතා පවසයි.
එම චෝදනා සඳහා බොහෝ සාක්ෂි ඉදිරිපත්ව ඇති බවත්, මේ වනවිට සාක්ෂිකරුවන් 25දෙනෙකු සාක්ෂි ලබාදීමට ඉදිරිපත්ව සිටින බවත් ඔහු සඳහන් කළේය. එම සාක්ෂිකරුවන්ගෙන් හරස් ප්රශ්න ඇසීමට හා ඔහු වෙනුවෙන් සාක්ෂිකරුවන් ඉදිරිපත් කිරීමට සරත් ෆොන්සේකාට මහතාට අවසර ඇති නමුත් ඔහු එම අවස්ථා දෙකම ප්රතික්ෂේප කර ඇති බව ද මාධ්ය ප්රකාශකවරයා ප්රකාශ කළේය.
සරත් ෆොන්සේකා මහතා සිය හමුදා සේවයෙන් සක්රීය ලෙස ඉවත්ව ඇත්තේ 2009 නොවැම්බර් මස 14වන දින බැවින් 2010 මැයි 14 වනදා දක්වා ඔහු හමුදා නීතියට යටත්බව ප්රසාද් සමරසිංහ මහතා සඳහන් කළේය. ඔහුට විරුද්ධව චෝදනා කිහිපයක්ම ඉදිරිපත්ව ඇති අතර එම චෝදනා සඳහා ඉදිරි දින කිහිපය තුළ හමුදා නීතියට අනුව පියවර ගන්නා බව ද ඒ මහතා පැවසීය. සාමාන්ය යුධ හමුදා පනතට අනුව යුධ අධිකරණය ඉදිරියේ වරදකරුවකු වන පුද්ගලයෙකුට උපරිම දඬුවම ලෙස වසර විස්සක සිර දඬුවම හෝ මරණ දණ්ඩනය නියම කළ හැකි යැයි මාධ්ය ප්රකාශකවරයා අවධාරණය කළේය.
මෙම චෝදනා සඳහා සරත් ෆොන්සේකා මහතා වැරදිකරු වුවහොත් එම තීරණයට විරුද්ධව ඔහුට අභියාචනාධිකරණය වෙත යා හැකි බව ද, එහිදීද ඔහුගේ ඉල්ලීම ප්රතික්ෂේප වුවහොත්, ශ්රේෂ්ඨාධිකරණයේ පිහිට පැතීම දක්වා යා හැකි බව ද ප්රසාද් සමරසිංහ මහතා ප්රකාශ කළේය.
|
බලය විදුහල්පතිට
2-18-2010
පාසල්වලට සිසුන් ඇතුළත් කරගැනීමේ බලය සම්පූර්ණයෙන්ම විදුහල්පතිවරයා වෙත පවරන බව අග්රාමාත්ය රත්නසිරි වික්රමනායක මහතා පවසයි.
එළඹෙන පාර්ලිමේන්තු මැතිවරණයෙන් පසුව පත්වන එක්සත් ජනතා නිදහස් සන්ධාන ආණ්ඩුවක් යටතේ මෙය ක්රියාත්මක වන බව ඒ මහතා පෙන්වා දෙයි. හොරණ අධ්යාපන කලාපයේ සියලුම පාසල්වලට පරිගණක තාක්ෂණය ලබාදීමේ වැඩපිළිවෙළ හඳුන්වා දීම වෙනුවෙන් හන්ඳුපැල්පොල කණිෂ්ඨ විද්යාලයේ පැවති උත්සවයක් අමතමින් අග්රාමාත්යවරයා මේ බව සඳහන් කළේය.
|
ෆේරියල් නිදහස් පක්ෂයට
2-18-2010
අද ෆේරියල් අෂ්රෆ් මහත්මිය ශ්රී ලංකා නිදහස් පක්ෂයට එක්වූ බව ජනාධිපති මාධ්ය අංශය "අද දෙරණ"ට සඳහන් කළේය.
ශ්රී ලංකාවේ කැබිනට් අමාත්ය ධූරයකට පත්වූ ප්රථම මුස්ලිම් කාන්තාව ඇයයි. 2000 වර්ෂයේදී ඇගේ සැමියා වූ හිටපු කැබිනටි අමාත්ය මොහොමඩ් අෂ්රෆ් මහතාගේ මරණයෙන් පසුව ඇය එසේ දේශපාලනයට අවතීර්ණ වූවාය.
|
නන්දන ගුණතිලක
2-18-2010
තැපැල් හා විදුලි සංදේශ අමාත්ය නන්දන ගුණතිලක මහතා ශ්රී ලංකා නිදහස් පක්ෂයේ කළුතර දිස්ත්රක් සංවිධායකවරයා ලෙස පත්කර තිබේ.
නන්දන ගුණතිලක මහතා ද එළඹෙන මහ මැතිවරණය සඳහා කළුතර දිස්ත්රික්කය නියෝජනය කරමින් එක්සත් ජනතා නිදහස් සන්ධානයෙන් තරග කිරීමට නියමිතය.
නන්දන ගුණතිලක අමාත්යවරයා ජනතා විමුක්ති පෙරමුණෙන් පසුගිය මහ මැතිවරණයේ දී පාර්ලිමේන්තුවට තේරී පත්වූ අතර පසුව විමල් වීරවංශ මන්ත්රීවරයා සමග එක්ව ජාතික නිදහස් පෙරමුණ පිහිටුවා ගනිමින් ආණ්ඩුවට එක්විය. අනතුරුව ජාතික නිදහස් පෙරමුණෙන් ද ඉවත් වූ අතර මේ වන විට ආණ්ඩුවේ ඇමතිවරයෙකු ලෙස කටයුතු කරයි.
|
දනුනගේ මව
2-18-2010
විනිමය පාලන පනතේ වගන්ති උල්ලංඝනය කරමින් නීති විරෝධී අයුරින් විදේශ මුදල් තොගයක් සිය භාරයේ තබා ගැනීමේ චෝදනාව ඇතුළු චෝදනා කිහිපයක් යටතේ අත්අඩංගුවට ගෙන අධිකරණය හමුවට ඉදිරිපත්කොට තිබූ ජෙනරාල් සරත් ෙµdන්සේකාගේ බෑණා වන දනුන තිලකරත්නගේ මව වන අශෝකා තිලකරත්න මහත්මිය දැඩි ඇප කොන්දේසි යටතේ රුපියල් කෝටි දෙකක පුද්ගලික ඇපමත මුදාහැරීමට ගල්කිස්ස ප්රධාන මහෙස්ත්රාත් හර්ෂ සේතුංග මහතා ඊයේ (17 දා) නියෝග කළේය.
අධිකරණයේ අවසරයකින් තොරව රටින් පිටව යැම තහනම් කොට සෑම ඉරුදිනකම දහවල් 12.00 ට පෙර අපරාධ පරීක්ෂණ දෙපාර්තමේන්තුව හමුවේ පෙනී සිටීමේ කොන්දේසියට යටත්ව රුපියල් ලක්ෂ 50 බැගින් වූ පුද්ගලික ඇප හතරක් යටතේ මුදා හැරීමට නියෝග කළ සැකකාරියගේ ඇපකරුවන් ලෙස ඇගේ සැමියා වන බ්රිගේඩියර් තියඩෝර් ගොඩ්වින් තිලකරත්න මහතා ඇතුළු පවුලේ සමීප ඥාතීන් සිවු දෙනෙකු පිළිගැනීමටද මහෙස්ත්රාත්වරයා නියෝග කළේය.
ඇගේ නමින් හා ඇගේ හිතවතුන් දෙදෙනකු නමින් පෞද්ගලික බැංකුවක ආරක්ෂිත සේප්පුවක තැන්පත්කොට තිබියදී අපරාධ පරීක්ෂණ දෙපාර්තමේන්තුව මගින් සොයාගත් රුපියල් මිලියන 15 ක මුදල හා රුපියල් කෝටි හයක් පමණ වටිනා විදේශ මුදල් නෝට්ටු තොගය ඉවත්කර ගැනීම වළක්වන ලෙස ද එම බැංකු පාලනාධිකාරියට මහෙස්ත්රාත්වරයා එහිදී නියෝග කළේය.
විදේශ ගමන් බලපත්රය අධිකරණයට භාරදීමට සැකකාරියට එහිදී නියෝග කළ මහෙස්ත්රාත්වරයා එම පරීක්ෂණයට අදාළ කිසිදු සාක්ෂිකරුවකුට බලපෑම් නොකරන ලෙස ද එහිදී අවවාද කළේය.
සැකකාරියගේ භාරයට එම මුදල් ලැබුණ අයුරු අනාවරණය කර ගැනීම සඳහා පවත්වන පරීක්ෂණය අවසන් නොමැති බවත්, ඇය ඇප මත මුදා හැරියහොත් පරීක්ෂණයේ සාක්ෂිකරුවන්ට බලපෑම් එල්ලවිය හැකි බවත් පෙන්වා දෙමින් අපරාධ පරීක්ෂණ දෙපාර්තමේන්තුව වෙනුවෙන් පෙනී සිටි පොලිස් පරීක්ෂක රොෂාන් මස්ඉඹුල මහතා සැකකාරිය තවදුරටත් රක්ෂිත භාරයේ තබන ලෙස එහිදී අධිකරණයෙන් ඉල්ලා සිටියේය.
සාක්ෂිකරුවන්ට බලපෑම් එල්ලවිය හැකි බවට පරීක්ෂණ නිලධාරීන් පෙන්වා දෙන කරුණු ප්රතික්ෂේප කරමින් එහිදී කරුණු දැක්වූ විත්තියේ ජ්යෙෂ්ඨ නීතිඥ අසේල රැකව මහතා දියවැඩියා රෝගියකු වන සිය සේවාදායිකාව රක්ෂිත භාරයට පත් කළහොත් ඇගේ ජීවිතය අනාරක්ෂිත තත්ත්වයට පත්විය හැකි බැවින් ඕනෑම කොන්දේසියක් යටතේ ඇප ලබාදෙන ලෙස කළ කරුණු දැක්වීම සලකා බැලූ මහෙස්ත්රාත්වරයා එම ඇප නියෝගය නිකුත් කළේය.
එම මුදල් පසුගිය ජනාධිපති මැතිවරණයට අපේක්ෂකයකු ලෙස ඉදිරිපත්වූ සැකකාරියගේ සමීප ඥාතියකු වන ජෙනරාල් සරත් ෆොන්සේකාගේ මැතිවරණ ව්යාපාරය සඳහා එකතුවූ මුදලින් ඉතුරු කොටස බවත් අදාළ පුද්ගලයන්ගෙන් තොරතුරු ලබාගෙන විමර්ශනය කළහොත් ඒ බව සනාථ කර ගැනීමට හැකිවන බවත් විත්තියේ නීතිඥවරයා එහිදී වැඩිදුරටත් පෙන්වා දුන්නේය. දෙපාර්ශ්වය විසින් කළ කරුණු දැක්වීම සලකා බැලූ මහෙස්ත්රාත්වරයා වැඩිදුර විභාගය මාර්තු මස 5 වැනි දිනට කල්තබමින් එම නියෝගය නිකුත් කළේය.
ජ්යෙෂ්ඨ නීතිඥ අසේල රැකව, මුදිත අබේරත්න, රවි මතුගම, අතුල රණගල, රංජිත් දහනායක, ප්රියන්ත විඡේසේකර, තරංග ද සිල්වා හා අජිත් පෙරේරා ඇතුළු නීතිඥ මණ්ඩලයක් විත්තිය වෙනුවෙන් පෙනී සිටි අතර පොලිස් පරීක්ෂක රොෂාන් මස්ඉඹුල හා පොලිස් පරීක්ෂක රාජපක්ෂ යන මහත්වරුන් පැමිණිල්ල මෙහෙයවූහ.
|
ටෙස්ට් තරග තුනක්
2-18-2010
මෙම වසරේ අග භාගයේදී ශ්රී ලංකාව සමග ටෙස්ට් ක්රිකට් තරග තුනකට සහභාගි වන ලෙස ඉන්දියාවට කළ ඇරයුමට ඉන්දියානු ක්රිකට් පාලක මණ්ඩලය විසින් දක්වන ලද සාර්ථක ප්රතිචාරය හේතුවෙන් ලබන ජූලි මසදී අදාළ තරගාවලිය ස්ථිර වශයෙන්ම පැවැත්වීමට තමන් කටයුතු සූදානම් කරන බව ශ්රී ලංකා ක්රිකට් සභාපති ඩී.එස්. ද සිල්වා මහතා "දිවයින" ට ඊයේ (17 දා) පැවැසීය.
සාමාන්යයෙන් වසරක් තුළ අවම වශයෙන් ටෙස්ට් තරග හයකට හෝ ලොව ප්රබල ක්රිකට් කණ්ඩායම් සහභාගි වන අතර ශ්රී ලංකාවට මෙම වසරේදී සහභාගි වීමට නියමිතව තිබුණේ බටහිර ඉන්දීය කොදෙව් කණ්ඩායම සමග ටෙස්ට් තරග තුනක් පමණි. (නොවැම්බර් මස ශ්රී ලංකාවේදී)
අදාළ තත්ත්වය අනුව ශ්රී ලංකා ක්රිකට් ආයතනය ප්රබල රටවල් කිහිපයකට ශ්රී ලංකාව සමග ටෙස්ට් තරගාවලියක් පැවැත්වීමට ආරාධනා කළද එම රටවල ක්රිකට් කාල සටහන කාර්ය බහුල වීම හේතුවෙන් එම ආරාධනා සඳහා නියත ප්රතිචාර ලැබී නොමැත. ලබන ජූලි මස ශ්රී ලංකාව, නවසීලන්තය සහ ඉන්දියාව අතර ශ්රී ලංකාවේදී පැවැත්වීමට නියමිත තුන්කොන් එක්දින ක්රිකට් තරගාවලියෙන් අනතුරුව ජූලි සහ අගෝස්තු මාසවල ශ්රී ලංකා-ඉන්දියා ටෙස්ට් තරගාවලිය පැවැත්වීමට කටයුතු සූදානම් වෙමින් පවතී. "අපි රටවල් කිහිපයක් සමග ශ්රී ලංකාවට ටෙස්ට් තරගාවලියක් ලබාගන්න පසුගිය කාලවල සාකච්ඡා කළා. නමුත් ඒ ඒ රටවල කාර්යබහුල තරග රටාව හින්ද එම සාකච්ඡා අසාර්ථක වුණා. මේ වසරේ ඉන්දියාවටත් ටෙස්ට් තරගවල අඩුවක් තියෙනවා. ඉන්දියාවට තිබෙන තරග කාල සටහන අනුව ජූලි අගෝස්තු මාසවල තරග නැති හින්ද ශ්රී ලංකාව සහ ඉන්දියාව අතර ටෙස්ට් තරග තුනක් පවත්වන්න ඉන්දියානු ක්රිකට් පාලක මණ්ඩලය එකඟ වුණා. ඒ තරගාවලියේ දින වකවානු අපි ඉදිරියේදී ප්රකාශයට පත් කරනවා. අපි උත්සහ කරනවා ඉන්දියාව සමග පැවැත්වෙන ටෙස්ට් තරග තුනෙන් එකක් හම්බන්තොට ක්රීඩාංගණයේත් පවත්වන්න." යෑයි ඩී. එස්. ද සිල්වා මහතා වැඩිදුරටත් පැවසීය.
අවසන් වරට ඉන්දියාව සහ ශ්රී ලංකාව අතර ඉකුත් වසරේ නොවැම්බර් සහ දෙසැම්බර් මාසවල ඉන්දියාවේ පැවැති ටෙස්ට් තරගාවලිය 2-0 ක් ලෙස ශ්රී ලංකාව පරාජය වීම හේතුවෙන් ශ්රී ලංකාව ටෙස්ට් ශ්රේණිගත කිරීම්වල සිව්වැනි ස්ථානයට පත් වූ අතර ඉන්දියාව පළමු ස්ථානයට පත්විය. එම තත්ත්වය මත නැවත වරක් ඉන්දියාව සහ ශ්රී ලංකාව අතර ශ්රී ලංකාවේදී ටෙස්ට් තරගාවලියක් පැවැත්වීම ශ්රී ලංකාවට ශ්රේණිගත කිරීම්වල ඉහළ ස්ථානයකට පැමිණීමට වාසිදායක අවස්ථාවක් වනු ඇත.
ලොව වැඩිම කඩුලු ලාභියා සහ ශ්රී ලංකාවේ සුපිරි දඟ පන්දු යවන්නා වන මුත්තයියා මුරලිදරන් ලබන නොවැම්බර් මස කොදෙව් කණ්ඩායම සමග පැවැත්වෙන ටෙස්ට් තරගාවලියේදී සමුගන්නා බව ප්රකාශයට පත් කර තිබීම හේතුවෙන් ඊට පෙර ඉන්දියාව සමග ටෙස්ට් තරග තුනකට ක්රීඩා කිරීමට ලැබීමෙන් ඔහුගේ ලෝක වාර්තාව තවදුරටත් ඉදිරියට ගෙන යාමටද හැකියාව ලැබෙනු ඇත.
|
|